Учора наш выкладчык па прадмеце Geopolitics распавядаў нам, што ў сучаснага сярэдняга еўрапейца (асабліва з усходняй еўропы) іслам асацыюецца з тэрарызмам, неразвітай культурай і тэхналогіямі, грамадскай адсталасцю. Але ж, кажа, насамрэч у часы, калі ў Еўропе панавалі “Цёмныя часы”, разруха і рэлігійнае цемрашальства, у арабскім халіфаце квітнелі прагрэс і навукі: матэматыка, медыцына, астралогія і г.д., і многім з гэтых ведаў Еўропа абавязана менавіта ісламскім навукоўцам.
І вось не прайшло і 8 гадзін з таго як ён нам гэта распавёў, едзем мы з Georgii Baryshnikov у тралейбусе. Ядзім сабе кебаб, нікому не перашкаджаем. Насупраць нас сядзіць стары беззубы дзед у пінжаке, кірзавых ботах і кепцы а-ля “калгаснік з савецкага плаката”. А збоку – два маладых хлопца, што размаўляюць па-французску, трохі чарнаватыя знешне падобныя на арабаў.
Дзед пачаў наступ з нас. Спачатку бубнеў сабе пад нос нешта неўцямнае (як потым аказалася – гнаў на нас за тое што мы елі ў траліку). Потым, ужо гучней, пераключыўся на араба-французаў: пачаў перадражніваць іхнюю мову (думаў, пэўна, што яны па-арабску размаўляюць), а потым сумессю літоўскай мовы і расейскага мату крычаў каб яны убіраліся з Літвы.
Мы на яго прыкрыкнулі, ён сціх, але ненадоўга. Падышоў да нас адзін з гэтых хлопцы:
– What does he says? – пацікавіўся з усмешкай
– Don’t pay attention. He’s just a rasist. He says you to get out of Lithuania.
Дзед працягнуў сваю лаянку а хлопцы тым часам саступалі месца жанчынам, што ўваходзілі у тралейбус. Хутка яны таксама выйшлі, і акурат за імі на тым жа прыпынку, хістаючыся, выйшаў віленскі электарат Трампа.
